تحریر: میر بابر مشتاق
بھارت میں شادی بیاہ کی تقریبات میں دولت کی نمائش کوئی نئی بات نہیں، لیکن ریاست بہار کے ایک بااثر سیاست دان کی بیٹی کی شادی نے شاہانہ تقریبات کے تمام سابقہ تصورات کو پیچھے چھوڑنے کی تیاری کر لی ہے۔ 25 نومبر کو ہونے والی اس شادی کے انتظامات ایسے ہیں کہ اسے محض ایک خاندانی تقریب کہنا مشکل ہے۔ کہیں سینکڑوں کاریگر دن رات سجاوٹ میں مصروف ہیں، کہیں چار لاکھ مہمانوں کے کھانے کی تیاریاں ہو رہی ہیں، کہیں گھوڑوں کی ریس کے لیے میدان سجایا جا رہا ہے اور کہیں کروڑوں روپے کی گاڑیاں زیرِ بحث ہیں۔
یہ شادی بھارت کے صوبہ بہار کے علاقے موکاما کے بااثر سیاست دان اننت سنگھ المعروف چھوٹے سرکار کی بیٹی شیوانگی سنگھ کی ہے، جن کا نکاح ریشکیش کمار عرف انکت سے 25 نومبر کو ہونا ہے۔
بھارتی اخبارات ٹائمز آف انڈیا، انڈیا ٹوڈے اور اکنامک ٹائمز کی رپورٹس کے مطابق شادی کی تقریب کے لیے اننت سنگھ کے آبائی گاؤں نداوان میں دس بیگھا سے زیادہ رقبے پر انتظامات کیے جا رہے ہیں۔ بعض رپورٹس میں اس رقبے کو 10 سے 12 بیگھا بتایا گیا ہے۔ شادی کے مرکزی اسٹیج کی اونچائی تقریباً 30 فٹ اور چوڑائی 100 فٹ رکھی گئی ہے۔ اس کی تیاری میں سیکڑوں کاریگر اور مزدور مصروف ہیں جبکہ پھول چین اور بنگلورو سے منگوائے جا رہے ہیں۔
چار لاکھ مہمان اور 150 سے زائد کھانے!
اس شادی کا سب سے حیرت انگیز پہلو مہمانوں کی متوقع تعداد ہے۔ اطلاعات کے مطابق تقریب میں تقریباً چار لاکھ افراد کی آمد متوقع ہے۔ ان کے لیے 150 سے زائد اقسام کے کھانوں کا انتظام کیا جا رہا ہے۔ بہار کے روایتی پکوانوں کے ساتھ ملک کے مختلف علاقوں کے کھانے بھی پیش کیے جائیں گے۔ مہمانوں کی بڑی تعداد کو مدنظر رکھتے ہوئے کھانے کے لیے الگ الگ مقامات اور خصوصی انتظامات کیے گئے ہیں تاکہ رش اور بدنظمی سے بچا جا سکے۔
یہاں ایک وضاحت ضروری ہے کہ بعض سوشل میڈیا پوسٹوں میں کھانے پر چالیس کروڑ روپے خرچ ہونے اور ایک ہزار کلو مٹن تیار کیے جانے کا دعویٰ کیا جا رہا ہے، لیکن معتبر اخباری رپورٹس میں ان مخصوص اعداد کی تصدیق نہیں ملتی۔ بعض بھارتی ذرائع نے پوری شادی کے انتظامات کا مجموعی تخمینہ 40 سے 50 کروڑ بھارتی روپے تک بتایا ہے، تاہم یہ بھی سرکاری طور پر تصدیق شدہ بجٹ نہیں۔
گھوڑوں کی ریس اور تھار کا انعام!
شادی کی تقریبات میں گھوڑوں کی دوڑ بھی شامل ہے، جس کے لیے تقریباً 12 بیگھا الگ میدان تیار کیا جا رہا ہے۔ 25 نومبر کو ہونے والی اس ریس میں مختلف ریاستوں سے گھوڑوں اور سواروں کی شرکت متوقع ہے۔
یہ بھی پڑھیے
بیوی کے لیے مہنگی لپ اسٹک لانا، شوہر کو مہنگا پڑگیا
سری نگر : 6 روپے کا ایک انڈا سوا 2 لاکھ روپے میں کیوں نیلام ہوا؟
پاکستانی لڑکی منگیتر کے پاس بھارت جا پہنچی، جنوری میں شادی ہوگی
دلچسپ بات یہ ہے کہ ریس جیتنے والے گھوڑے کے مالک کو مہندرا تھار ایس یو وی انعام میں دی جائے گی، دوسرے نمبر پر آنے والے کو موٹر سائیکل اور تیسرے نمبر پر آنے والے کو اسکوٹی ملے گی۔ اس مقابلے کو شادی کی تقریبات کا ایک بڑا حصہ قرار دیا جا رہا ہے۔
دولہے کے لیے تین کروڑ کی ڈیفنڈر!
تحائف کے معاملے میں بھی یہ شادی غیر معمولی ہے۔ بھارتی میڈیا کے مطابق دولہے ریشکیش کمار کے لیے لینڈ روور ڈیفنڈر گاڑی کا انتظام کیا گیا ہے، جس کی قیمت تقریباً ڈھائی سے تین کروڑ بھارتی روپے بتائی جا رہی ہے۔ اننت سنگھ کے چھوٹے بیٹے ابھینو کے لیے بھی تقریباً ایک کروڑ روپے کی بی ایم ڈبلیو کا ذکر ہے، کیونکہ اسی موقع پر ان کی جنیئو کی رسم بھی ادا کی جائے گی۔
مہمانوں میں مودی، نتیش اور لالو بھی!
شادی کی مہمانوں کی فہرست بھی غیر معمولی ہے۔ اننت سنگھ نے وزیراعظم نریندر مودی، سابق وزیراعلیٰ نتیش کمار، لالو پرساد یادیو اور تیجسوی یادیو سمیت متعدد اہم سیاسی شخصیات کو مدعو کرنے کی خواہش ظاہر کی ہے۔ اسمبلی اسپیکر پریم کمار کو دعوت نامہ دیے جانے کی بھی رپورٹ ہے۔
بھوجپوری فلم انڈسٹری کے معروف فنکاروں اور گلوکاروں سمیت دیگر شوبز شخصیات کو بھی دعوت دی گئی ہے۔ تاہم دعوت نامہ بھیجے جانے اور ان شخصیات کی تقریب میں شرکت کی تصدیق ہونے میں فرق ہے۔
اننت سنگھ نے یہ اعلان بھی کیا ہے کہ تقریب میں آنے والوں کے لیے سیاسی وابستگی کی کوئی پابندی نہیں، بھارت ہو یا پاکستان، دنیا کے کسی بھی حصے سے آنے والے مہمانوں کا خیرمقدم کیا جائے گا۔
دولت کی نمائش یا سماجی طاقت کا مظاہرہ؟
یہاں سے ایک دلچسپ سوال شروع ہوتا ہے۔ کیا یہ محض ایک باپ کی طرف سے اپنی بیٹی کی شادی کو یادگار بنانے کی کوشش ہے یا اس تقریب کے ذریعے سیاسی، سماجی اور مالی اثرورسوخ کا اظہار بھی کیا جا رہا ہے؟
دولت کمانا جرم نہیں اور اپنے بچوں کی خوشیوں پر خرچ کرنا ہر شخص کا ذاتی معاملہ ہے۔ لیکن جب ایک شادی میں لاکھوں مہمانوں، کروڑوں کی گاڑیوں، شاہانہ سجاوٹ اور قیمتی انعامات کا ذکر ہو تو معاشرے کے دوسرے طبقوں کی محرومی بھی نگاہوں کے سامنے آتی ہے۔
ہمارے خطے میں ایک طرف ایسے والدین ہیں جو بیٹی کی شادی کے لیے برسوں رقم جمع کرتے ہیں، قرض لیتے ہیں اور اپنی جمع پونجی ختم کر دیتے ہیں، دوسری طرف ایسی تقریبات ہیں جہاں ایک ہی دن میں کروڑوں روپے خرچ کرنے کی استطاعت موجود ہے۔
اسلام نے شادی کو آسان بنانے اور اسراف سے بچنے کی تعلیم دی ہے۔ قرآن مجید میں ارشاد ہے:
’ اور کھاؤ اور پیو اور اسراف نہ کرو، بے شک اللہ اسراف کرنے والوں کو پسند نہیں کرتا۔ ‘ (الاعراف: 31)
اصل کامیابی شادی کے اسٹیج کی بلندی، مہمانوں کی تعداد یا تحائف کی قیمت سے نہیں بلکہ اس رشتے کی مضبوطی، محبت اور ذمہ داری سے متعین ہوتی ہے جو دو انسانوں کو زندگی بھر کے لیے جوڑتا ہے۔
بہرحال 25 نومبر کی یہ شادی اپنے غیر معمولی انتظامات کے باعث بھارت ہی نہیں، دنیا بھر کے میڈیا کی توجہ حاصل کر رہی ہے۔ لیکن ایک سوال اپنی جگہ موجود ہے۔
کیا کسی شادی کی عظمت اس بات سے طے ہوتی ہے کہ اس میں کتنے لاکھ مہمان آئے اور کتنے کروڑ خرچ ہوئے، یا اس بات سے کہ اس شادی کے بعد کتنے لوگوں کی زندگی میں آسانی پیدا ہوئی؟
دولت کی نمائش چند دن خبروں میں رہتی ہے، لیکن انسانیت کے لیے کیا گیا کام نسلوں تک یاد رکھا جاتا ہے۔









