ایرانی سرکاری میڈیا نے ایران کے سپریم لیڈر سید علی خامنہ ای کی ہلاکت کی تصدیق کر دی ہے خبر ایجنسی تسنیم نیوز ایجنسی اور فارس نیوز ایجنسی نے اعلان کیا ہے کہ ایران کے سپریم لیڈر آیت اللہ علی خامنہ ای شہید ہو گئے ہیں۔
اطلاعات کے مطابق ایران کی ریاستی ٹیلی ویژن اور سرکاری ذرائع نے ان کے شہید ہونے کی تصدیق کرتے ہوئے اسے ایک حملے کا نتیجہ قرار دیا ہے۔
40 روزہ قومی سوگ کا اعلان بھی کیا گیا ہے، جبکہ سرکاری میڈیا خامنہ ای کو ملک کے سپریم لیڈر کے طور پر پیش کر رہا ہے جنہوں نے ایک طویل عرصے تک ایران کی قیادت کی۔
بعض رپورٹس کے مطابق حملے میں ان کے خاندان کے افراد بھی شہید ہوئے ہیں، جن میں ان کی بیٹی، داماد اور نواسہ شامل ہیں، اگرچہ اس کی تفصیلات مختلف میڈیا ذرائع میں تھوڑی مختلف بیان ہو رہی ہیں۔
خامنہ ای کب اور کہاں شہید ہوئے؟
اطلاعات کے مطابق خامنہ ای ہفتے کی صبح کے ابتدائی اوقات میں اپنے دفتر میں اپنے مقرر کردہ فرائض انجام دیتے ہوئے شہید ہوئے۔ یہ واقعہ اسی وقت ہوا جب ایران پر امریکا اور اسرائیل کے مشترکہ حملوں کے سلسلے میں فضا اور زمینی اہداف پر کارروائیاں جاری تھیں۔
سرکاری اعلان
ایرانی ریاستی ٹیلی ویژن نے اتوار کو صبح اعلان کیا کہ 86 سالہ سپریم لیڈر شہید ہوگئے ہیں اور ملک بھر میں 40 روزہ سرکاری سوگ اور سات دن کی تعطیلات کا اعلان کیا گیا ہے۔
فارس نیوز ایجنسی نے بتایا کہ خامنہ ای اپنے دفتر میں موجود تھے جب حملہ ہوا، اور اسی وقت وہ شہید ہو گئے۔
ایرانی ذرائع نے مزید کہا ہے کہ اس حملے میں ان کے خاندان کے دیگر افراد بیٹی، داماد اور نواسہ بھی شہید ہو گئے، اگرچہ ان دعوؤں کی مکمل تفصیلات مختلف رپورٹس میں مختلف ہیں۔
پاسداران انقلاب یعنی اسلامی انقلابی گارڈ کور (آئی آر جی سی) نے ایران کے سپریم لیڈر علی خامنہ ای کی شہادت پر ردِعمل دیتے ہوئے ان کی شہادت کی تصدیق اور شدید ردِعمل کا اظہار کیا ہے۔
خبر رساں ادارے فارس نیوز ایجنسی کے مطابق آئی آر جی سی نے اپنے بیان میں کہا کہ ہم ایک عظیم رہنما سے محروم ہوگئے ہیں اور ہم ان کے غم میں سوگوار ہیں۔
بیان کے مطابق خامنہ ای کی شہادت انسانیت کے بدترین دہشتگردوں اور جلادوں کے ہاتھوں ہوئی، اور اسے ان کی قیادت کی حقانیت اور ان کی مخلصانہ خدمات کی قبولیت کی علامت قرار دیا گیا۔
یہ بھی پڑھیے
ایرانی سپریم لیڈر خامنہ ای جاں بحق، امریکی و اسرائیلی دعوے، ایران کی تردید
خامنہ ای جنگ میں کام آگئے تو جانشین علی لاریجانی ہوں گے؟
پاسداران انقلاب نے خبردار کیا کہ ایرانی قوم کا ہاتھِ انتقام انہیں چھوڑے گا نہیں
اور یہ کہ تنظیم داخلی و خارجی سازشوں کے خلاف ڈٹ کر مقابلہ جاری رکھے گی۔
ایرانی سرکاری ذرائع نے سپریم لیڈر کے مشیر اور آئی آر جی سی کمانڈر کی شہادت کی بھی تصدیق کر دی ہے۔
سرکاری ٹی وی اور خبر ایجنسیوں کے مطابق علی شمخانی، جو ایران کے سپریم لیڈر کے خصوصی مشیر اور دفاعی کونسل کے سیکریٹری تھے، شہید ہو گئے ہیں۔
میجر جنرل محمد پاکپور، جو پاسداران انقلاب کے کمانڈر تھے، بھی شہید ہوگئے ہیں۔
یہ اعلان ایران کے سرکاری میڈیا اور عدلیہ کے آن لائن پورٹل میں کیا گیا ہے، جو امریکا اور اسرائیل کی فضائی کارروائیوں کے بعد سامنے آیا ہے۔
