سید بدر سعید
آپ پیسے کمانا چاہتے ہیں لیکن وسائل کی کمی کا شکار ہیں تو یہ تحریر آپ کے لیے ہے۔
آپ کے پاس کیمرے، سٹوڈیو اور دیگر اخراجات کے لیے بھی رقم نہیں ہے تو پریشان نہ ہوں کیونکہ آج ہم سوشل میڈیا کے اس ’اوپن سیکریٹ‘ پر بات کریں گے جس نے انٹرنیٹ پر پیسہ کمانے کا پورا زاویہ بدل دیا ہے۔
آپ نے یوٹیوب، فیس بک اور ٹک ٹاک پر پچاس سیکنڈ کے وہ کلپ تو لازمی دیکھے ہوں گے جنہیں دیکھتے ہی انگلی خودبخود سکرول کرنا چھوڑ دیتی ہے اور ہم پوری بات سنے بغیر آگے نہیں بڑھ پاتے۔
پوری ویڈیو میں سے وہ خاص ٹکڑا یا کلپ کاٹنے والا، اس پر جاندار سرخی جمانے والا اور اس میں جذبات بھرنے والا انسان کلپر (Clipper) کہلاتا ہے۔ کلپر روایتی ایڈیٹر نہیں ہوتا بلکہ وہ ڈیجیٹل دور کا ایسا کہانی کار ہے جو گھنٹوں لمبی گفتگو میں سے سونے کا وہ نوالہ ڈھونڈ نکالتا ہے جس کی تلاش میں کروڑوں ناظرین بھٹک رہے ہوتے ہیں۔
سب سے خوبصورت بات یہ ہے کہ اس کام کے لیے آپ کو کسی مہنگے کیمرے کے سامنے آ کر جھجکنے کی ضرورت ہے اور نہ ہی لاکھوں روپے کے اسٹوڈیو کا بوجھ اٹھانا ہے۔ آپ کی بصیرت اور ایک سکرین ہی آپ کی سب سے بڑی سلطنت ہے۔
اب سوال یہ پیدا ہوتا ہے کہ لوگ اس کام سے کتنا اور کیسے کما رہے ہیں؟ اس حوالے سے حقائق سن کر انسان دنگ رہ جاتا۔
دنیا اس وقت شارٹ ویڈیوز کی شدید پیاسی ہے اور بڑے پوڈ کاسٹرز کے پاس اتنا وقت نہیں کہ وہ بیٹھ کر خود ریلز تراشیں۔ بیرون ملک کلپرز کو صرف چار سے پانچ منٹ کا مواد روزانہ دینے پر پندرہ سو سے چار ہزار ڈالرز ماہانہ دیے جا رہے ہیں۔ اگر آپ اپنے ملک پاکستان کی بات کریں تو سنجیدہ پوڈکاسٹرز، بڑے صحافی اور اینکرز اپنے سوشل میڈیا ہینڈلز سنبھالنے والے ایک متحرک کلپر کو چالیس سے اسی ہزار روپے فی مہینہ بخوشی دیتے ہیں۔ اگر آپ صرف تین اچھے کلائنٹس سنبھال لیں تو آپ کی ماہانہ آمدنی باآسانی ڈیڑھ سے دو لاکھ روپے کو چھو لیتی ہے۔
یہ بات صرف تنخواہ تک محدود نہیں رہتی۔ جب آپ کا اپنا کوئی کلپنگ پیج وائرل ہوتا ہے اور فالوورز لاکھوں تک پہنچتے ہیں تو فیس بک اور یوٹیوب کی مونیٹائزیشن کھلتی ہے اور مقامی برانڈز صرف اپنی پروموشن کے لیے آپ کی منتیں کرتے ہیں۔ یہ خواب نہیں ہے بلکہ ہر روز سینکڑوں محنتی نوجوانوں کے ساتھ پیش آنے والی حقیقت ہے۔
یہ بھی پڑھیے
میں سوشل میڈیا ویڈیوز وائرل کر کے سالانہ 120,000 پاؤنڈ کماتا ہوں
برانڈنگ: ڈیجیٹل دور میں اپنی محنت کی قیمت کیسے بڑھائیں؟
غیرملکی طلبہ کا ہوم ورک کرکے پیسے کمانے والے پاکستانی نوجوان
آئیے اب عملی قدم اٹھاتے ہیں اور سیکھتے ہیں کہ یہ سفر کس طرح طے
کیا جائے:
پہلا قدم: چونکا دینے والے لمحے کی تلاش
پہلے یوٹیوب پر ایسا انٹرویو یا مباحثہ چنیں جس میں بات زوردار ہو۔ پوری ویڈیو کو دیکھنے کی ضرورت نہیں بلکہ اس کے تند و تیز حصے پر نظر رکھیں۔ یاد رکھیں کہ سارا کھیل پہلے تین سیکنڈز کا ہے۔ اگر آپ نے شروع میں ہی ایسا سوال یا فقرہ رکھ دیا جو تجسس کی آگ بھڑکا دے تو ناظرین آخر تک ویڈیو چھوڑ کر کہیں نہیں جائیں گے۔
دوسرا قدم : سمارٹ طریقے سے ویڈیو کو سیدھا کرنا
روایتی لمبی ویڈیو ٹی وی فارمیٹ یعنی لینڈ اسکیپ میں ہوتی ہے مگر ہمارا ہدف موبائل کی سیدھی سکرین ہے۔ یہاں آپ نے ویڈیو کو کاٹ کر چہرے کو عین بیچ میں لانا ہوتا ہے۔ اگر سکرین پر میزبان اور مہمان دونوں بات کر رہے ہیں تو اسپلٹ اسکرین کا استعمال کریں تاکہ اوپر بولنے والا اور نیچے سننے والا بیک وقت دکھائی دے اور گفتگو کا تاثر زائل نہ ہو۔
تیسرا قدم : بولتے ہوئے سب ٹائٹلز اور جاندار آواز
زیادہ تر ناظرین عوامی جگہوں پر یا سفر کے دوران بغیر آواز کے ویڈیوز چلاتے ہیں۔ اس کا علاج متحرک کیپشنز ہیں۔ سکرین پر ایک ایک لفظ بولڈ اور رنگین انداز میں ابھرنا چاہیے تاکہ پڑھنے والا لفظوں کے ساتھ بہتا چلا جائے۔ گفتگو میں جہاں بات سنجیدہ ہو وہاں پس منظر میں ہلکی سی دھن لگا دیں تاکہ سننے والے کے دل پر سیدھی ضرب لگے۔
چوتھا قدم : روزانہ کا تسلسل اور مارکیٹ میں قدم
روزانہ بلا ناغہ دو سے تین کلپس اپنے یوٹیوب شارٹس، ٹک ٹاک اور انسٹاگرام پر ڈالیں۔ شروع میں ویوز کم آئیں تو گھبرانا نہیں کیونکہ الگورتھم آپ کا مستقل مزاجی کا امتحان لیتا ہے۔ جب آپ پندرہ بیس بہترین کلپس بنا لیں تو اپنے پسندیدہ پوڈکاسٹر کو براہ راست میسج بھیجیں کہ میں نے آپ کی لمبی ویڈیو کے یہ تین شاہکار کلپس مفت تیار کیے ہیں۔ کیا میں آپ کے لیے باقاعدہ کام کر سکتا ہوں؟ وہ کام دیکھ کر کبھی انکار نہیں کر پائیں گے۔
اس کام کو تیز اور آسان بنانے کے لیے پاکستان میں بالکل درست کام کرنے والے اور مفت آزمائش دینے والے ٹولز کے روابط یہ ہیں:
طویل ویڈیو سے خودکار وائرل کلپس کاٹنے اور اسکور جانچنے کے لیے:
(اوپس کلپ ہر نئے صارف کو شروع میں مفت کریڈٹس دیتا ہے اور یہ پاکستان میں بغیر کسی رکاوٹ کے چلتا ہے۔)
یوٹیوب ویڈیو سے براہ راست موبائل شارٹس اور چہرے کی ٹریکنگ کے لیے:
(کلیپ کا فری ٹرائل لنک ڈال کر فوری آزمایا جا سکتا ہے)
موبائل اور کمپیوٹر پر مکمل ایڈیٹنگ، آٹو کیپشنز اور ساؤنڈ لگانے کے لیے:
(کیپ کٹ پاکستان میں ویب براؤزر اور موبائل ایپ دونوں پر بالکل مفت دستیاب ہے)
وسائل کی کمی کا رونا رونے کا دور اب بیت چکا ہے۔ آپ کو نہ تو کسی بڑی ڈگری کی سند چاہیے اور نہ ہی کوئی بھاری سفارش۔ ساری دنیا کا خزانہ آپ کے انٹرنیٹ اور آپ کی انگلیوں کے نیچے دھرا ہے۔ صرف سستی کی چادر اتارنی ہے ۔
آج ہی کسی ایک پوڈکاسٹ کا لنک اٹھائیے اور اپنا پہلا کلپ تراش کر میدان میں اتر آئیے۔
کل کا وائرل کلپر آپ خود ہو سکتے ہیں۔
